តំណាងឯកឧត្តមបណ្ឌិតសភាចារ្យ ហង់ជួន ណារ៉ុន ចាត់ទុកថា វគ្គអាជ្ញាកណ្តាល-ចៅក្រមតេក្វាន់ដូនឹងជួយអភិវឌ្ឍន៍នៅ ស៊ីហ្គេម ២០២៣

ភ្នំំំំពេញញ :ថ្ងៃទី០៩ ខែធ្នូ ឆ្នាំ២០២១

លោក ម៉ៅ ស្រេង ប្រធានស្ថាប័ន IDP & ACE កម្ពុជា និងជាអនុប្រធានខេមរសហព័ន្ធតេក្វាន់ដូ (WT) តំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធតេក្វាន់ដូ WT បានចាត់ទុកថា វគ្គបណ្តុះបណ្តាលអាជ្ញាកណ្តាលចៅក្រមថ្នាក់ជាតិ នឹងអាចក្លាយខ្លួនទៅជាអាជ្ញាកណ្តាល-ចៅក្រមអន្តរជាតិ ដើម្បីត្រៀមឆ្ពោះទៅទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់កម្ពុជា។

តំណាងប្រធានសហព័ន្ធរូបនេះបានចាត់ទុកថា វគ្គបណ្តុះបណ្តាលនេះនឹងជួយអភិវឌ្ឍន៍ដល់វិស័យកីឡាតេក្វាន់ដូ WT នៅកម្ពុជាឱ្យរីកចម្រើនទៅមុខបន្តទៀត។ ការរៀបចំវគ្គបណ្តុះបណ្តាលអាជ្ញាកណ្តាល-ចៅក្រមថ្នាក់ជាតិ នាពេលនេះគោលដៅចង់ឱ្យប្អូនៗយកទៅបម្រើឱ្យការប្រកួតកីឡាតេក្វាន់ដូ WT ក្នុងប្រទេស និងឆ្ពោះទៅធ្វើជាអាជ្ញាកណ្តាលអន្តរជាតិ សម្រាប់កម្មវិធីប្រកួតកីឡាតេក្វាន់ដូនានា លើឆាកអន្តរជាតិ ពិសេសសម្រាប់ត្រៀមធ្វើជាម្ចាស់ផ្ទះ នៃការប្រកួតកីឡា ស៊ីហ្គេម ឆ្នាំ២០២៣។

ឯកឧត្តមបណ្ឌិត ជ្រិន សុធា អគ្គលេខាធិការខេមរសហព័ន្ធកីឡាតេក្វាន់ដូ WT បានលើកឡើងថា វគ្គបណ្តុះបណ្តាលអាជ្ញាកណ្តាល-ចៅក្រមតេក្វាន់ដូ WT ថ្នាក់ជាតិ ប្រចាំឆ្នាំ២០២១នេះ បានប្រព្រឹត្តទៅចាប់ពីថ្ងៃទី០៥-០៨ ខែធ្នូ ឆ្នាំ២០២១ នៅសាលា ACE សាខាចាក់អង្រែក្រោម សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដោយមានសិក្ខាកាមមកពីបណ្តាក្លិបកីឡាតេក្វាន់ដូ WT រាជធានី-ខេត្ត សរុបចំនួន ២០នាក់ (ស្រី៨នាក់) ក្នុងនោះមកពីខេត្តបាត់ដំបងចំនួន ៤នាក់ ស្រី ១នាក់, ខេត្តសៀមរាបចំនួន៣នាក់, ខេត្តមណ្ឌលគិរីចំនួន១នាក់, និងរាជធានីភ្នំពេញចំនួន ១២នាក់ ស្រី ០៧នាក់។

ឯកឧត្តមអគ្គលេខាធិការបន្តថា វគ្គនេះអាចដំណើរការទៅបានដោយសារមានការគាំទ្រពីក្រសួងអប់រំ យុវជន និងកីឡា តាមរយៈថវិកាគ្រាំទ្រជួយពន្លឿនដល់ការអភិវឌ្ឍរបស់ខេមរសហព័ន្ធតេក្វាន់ដូប្រចាំឆ្នាំ២០២១ ។ ការរៀបចំវគ្គបណ្តុះបណ្តាលនេះ គឺដើម្បីផ្តល់ឱកាសដល់សិក្ខាកាមទាំងអស់បានក្រេបយកចំណេះដឹងថ្មីៗ និងទទួលនូវបទពិសោធន៍ជាច្រើនទៀតពីគ្រូបង្គោលជាអាជ្ញាកណ្តាលអន្តរជាតិ ក្នុងការត្រៀមខ្លួនឱ្យក្លាយជាអាជ្ញាកណ្តាលអន្តរជាតិបន្តវេនជំនាន់ក្រោយៗ ហើយក៏ជាក្តីសង្ឃឹមសម្រាប់ខេមរសហព័ន្ធតេក្វាន់ដូ ឆ្ពោះទៅធ្វើម្ចាស់ផ្ទះ ស៊ីហ្គេម ឆ្នាំ២០២៣ របស់កម្ពុជាផងដែរ។

សូមបញ្ជាក់ថា ជាលទ្ធផលប្រឡងបញ្ចប់វគ្គ អាជ្ញាកណ្តាល-ចៅក្រមទទួលបាននិទ្ទេសល្អ ៣នាក់ស្មើ១៥ភាគរយ, ល្អបង្គួរ ១០នាក់ (ស្រី៦នាក់) ស្មើ៥០ភាគរយ, និងមធ្យម ៧នាក់ (ស្រីម្នាក់) ស្មើ៣៥ភាគរយ។ ក្នុងឱកាសបិទវគ្គនេះក៏មានការចូលរួមពីលោក ទុយ វិច្ឆិកា ប្រធានការិយាកីឡាទំនើបតំណាងលោក ហ៊ុន សាមុត នាយកដ្ឋានអប់រំកាយ និងកីឡា នៃក្រសួងអប់រំ យុវជន និងកីឡា និងលោកស្រី សុខ ធីតា តំណាងសាលា ACE សាខាចាក់អង្រែក្រោមផងដែរ៕ដោយហេង ណាលីន សម្រួលផ្សាយដោយ៖ dara

(សូមអានបន្ត)

ឯកឧត្តមថោង ខុន ត្រូវបាន ក្រុមប្រឹក្សាកីឡាអាស៊ីអាគ្នេយ៍ ប្រកាសតែងតាំងជាសហប្រធានដឹកនាំការរៀបចំការប្រកួតស៊ីហ្គេម ឆ្នាំ២០២៣ នៅកម្ពុជា

ភ្នំពេញ៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានអញ្ជើញចូលរួមប្រជុំអនឡាញ កាលពីថ្ងៃទី៧ ខែធ្នូ ឆ្នាំ២០២១ នៅក្នុងក្របខណ្ឌក្រុមប្រឹក្សាកីឡាអាស៊ីអាគ្នេយ៍ ដោយទទួលបានលទ្ធផលល្អ ប្រសើរយ៉ាងច្រើន សម្រាប់ស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម និងការធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ របស់កម្ពុជា។

ថ្លែងក្រោយកិច្ចប្រជុំពិសេសនេះ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា ក្រុមប្រឹក្សាកីឡាអាស៊ីអាគ្នេយ៍ បានត្រួតពិនិត្យវឌ្ឍនភាពការងារ ដោយក្នុងនោះម្ចាស់ផ្ទះស៊ីហ្គេម វៀតណាម បានកំណត់កាលបរិច្ឆេទច្បាស់លាស់ ពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ ហើយម្ចាស់ ផ្ទះវៀតណាម បានធានាអះអាងឱ្យការរៀបចំការប្រកួតកីឡា ស៊ីហ្គេម របស់ខ្លួន ទទួលបានជោគជ័យ។

ឯកឧត្តម បញ្ជាក់ថា អ្វីដែលពិសេស គឺឯកឧត្តមបណ្ឌិត ថោង ខុន ត្រូវបានក្រុមប្រឹក្សាកីឡាអាស៊ីអាគ្នេយ៍ ប្រកាសតែងតាំងជាសហប្រធានដឹកនាំការរៀបចំការប្រកួតស៊ីហ្គេម ឆ្នាំ២០២៣ នៅកម្ពុជា ដោយសារម្ចាស់ផ្ទះស៊ីហ្គេម វៀតណាម មិនទាន់បាន បញ្ចប់បេសកកម្មរបស់ខ្លួន។ រឿងសំខាន់នៅក្នុងពេលដំណាលគ្នានេះដែរ គឺក្រុមប្រឹក្សាកីឡាអាស៊ីអាគ្នេយ៍ និងគណៈកម្មាធិការជាតិអូឡាំពិកនៃបណ្តាប្រទេសទាំងអស់ ក្នុងអាស៊ីអាគ្នេយ៍ បានសម្តែងការអបអរសាទរដល់កម្ពុជា មិនត្រឹមសម្រាប់តែសហប្រធានស៊ីហ្គេមប៉ុណ្ណោះទេ ប៉ុន្តែថែមទាំងអបអរដល់កម្ពុជា ដែលទទួលធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ នាឆ្នាំ២០២៩ ផងដែរ ។

ជាមួយគ្នានោះ កម្ពុជាក៏បានបង្ហាញវឌ្ឍនភាពការងាររបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើក ទី៣២ ឆ្នាំ២០២៣ (CAMSOC) ដោយយើងបានធ្វើបទបង្ហាញពីការរៀបចំ គ្រប់គ្រង ដឹកនាំ ព្រមទាំងយុទ្ធសាស្ត្រមួយចំនួនទៀត ផ្តល់ជូនដល់បណ្តាប្រទេសផ្សេងៗទៀត ដើម្បីត្រៀមលក្ខណៈចូលរួម ស៊ីហ្គេម នៅឆ្នាំ២០២៣ ដូចជាប្រភេទកីឡាមួយចំនួនដែលមិនទាន់បានកំណត់ចុងក្រោយ ក្នុងចំណោមជាង៤០ប្រភេទកីឡា។

ឯកឧត្តម វ៉ាត់ ចំរើន សង្កត់ធ្ងន់ថា នៅក្នុងសារលិខិតគន្លឹះរបស់ឯក ឧត្តមបណ្ឌិត ថោង ខុន ក្នុងនាមសហប្រធានស៊ីហ្គេម បានជម្រាបជូនដល់សមាជិកអាស៊ីអាគ្នេយ៍ទាំងអស់ថា កម្ពុជាបានធូរស្រាលពីជំងឺកូវីដ-១៩ និងបានបើកដំណើរការប្រទេសឡើងវិញ ហើយឯកឧត្តមបណ្ឌិត បានអញ្ជើញភ្ញៀវទាំងអស់ មកចូលរួមកិច្ចប្រជុំពិសេសដោយផ្ទាល់មួយនៅកម្ពុជា នាខែកុម្ភៈ ឆ្នាំ២០២២ ជាលើកដំបូង នៅទឹកដីនៃខេត្តសៀមរាប។ បណ្តាប្រទេសទាំងអស់ បង្ហាញនូវភាពរីករាយ និងគាំទ្រដល់កម្ពុជា សម្រាប់ការទទួលធ្វើម្ចាស់ផ្ទះ កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ នាដើមឆ្នាំ២០២២។

ឯកឧត្តមបណ្ឌិត ថោង ខុន បានបង្ហាញពីការទទួលធ្វើម្ចាស់ផ្ទះ ដោយភាពកក់ក្តៅ កិត្តិយសជាតិ កិត្យានុភាពជាតិ ក្នុងនាមជាប្រទសដែលមានអរិយធម៌ វប្បធម៌ដ៏សម្បូរបែប ដោយយើងនឹងបង្ហាញពីសក្តានុពលជាតិ ទៅកាន់អន្តរជាតិ តាមរយៈកិច្ចប្រជុំក្រុមប្រឹក្សាកីឡាអាស៊ីអាគ្នេយ៍នៅកម្ពុជា ជាញឹកញាប់នាពេលខាងមុខ ក៏ដូចជាដល់ព្រឹត្តិការណ៍ កីឡាស៊ីហ្គេម ឆ្នាំ២០២៣ ទៀតផង។កម្ពុជានឹងស្វែងរកការគាំទ្របន្ថែមពីអន្តរជាតិ នៅក្នុងការប្តេជ្ញាចិត្តខ្ពស់ប្រឹងប្រែងអស់ពីលទ្ធភាព ធ្វើយ៉ាងណាឱ្យការទទួលធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា ទទួលបានជោគជ័យ៕

(សូមអានបន្ត)

ថ្នាក់ដឹកនាំខេត្តមណ្ឌលគិរី អញ្ជើញចែកវិញ្ញាបនបត្រសម្គាល់ម្ចាស់អចលនវត្ថុជូនអ្នកកាន់កាប់ដី នៅភូមិពូតាំង សង្កាត់រមនា ក្រុងសែនមនោរម្យ

មណ្ឌលគិរី៖ នារសៀលថ្ងៃទី០៦ ខែធ្នូ ឆ្នាំ២០២១ ឯកឧត្តម ថង សាវុន អភិបាលខេត្តមណ្ឌលគិរី និងឯកឧត្តម ម៉ែន ង៉ុយ ប្រធានក្រុមប្រឹក្សាខេត្ត បានអញ្ជើញជាអធិបតី ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនអ្នកកាន់កាប់ដី នៅភូមិពូតាំង សង្កាត់រមនា ក្រុងសែនមនោរម្យ ដោយ មានការអញ្ជើញចូលរួមពីសំណាក់លោក លោកស្រី អភិបាលរងខេត្ត កងកម្លាំងប្រដាប់អាវុធទាំងបី ថ្នាក់ដឹកនាំមន្ទីរអង្គភាពជុំវិញខេត្ត និងប្រជាពលរដ្ឋជាច្រើនរូប ដែលប្រព្រឹត្តទៅនៅបរិវេណសាលា បឋមសិក្សាពូតាំង ស្ថិតនៅក្រុងសែនមនោរម្យ។

ឯកឧត្តម ថង សាវុន អភិបាលខេត្ត បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ ជាពិសេស មន្ទីររៀបចំដែនដីនគររូបនីយកម្ម សំណង់ និងសុរិយោដីខេត្ត ដែលបានខិតខំប្រឹងប្រែងយកចិត្តទុកដាក់អនុវត្តនូវភារកិច្ចរបស់ខ្លួន ក៏ដូចជាបានខិតខំប្រឹងប្រែងចូលរួមអនុវត្តគោលនយោបាយរបស់រដ្ឋាភិបាល។ ឯកឧត្តម បញ្ជាក់ថា ការចែកវិញ្ញាបនបត្រនាពេលនេះ គឺជាការអនុវត្តន៍ការងាររបស់កម្មវិធីអនុវិស័យរដ្ឋបាលដីធ្លី នៃក្រសួងរៀបចំដែនដី នគររូបនីយកម្ម និងសំណង់ ដែលជាគោលនយោបាយរបស់រាជ រដ្ឋាភិបាលដីធ្លី ក្នុងការកែទម្រង់រដ្ឋ ទប់ស្កាត់ការកាប់រានដីរដ្ឋខុសច្បាប់ និងកាត់បន្ថយទំនាស់ដីធ្លី តាមយុទ្ធសាស្រ្តចតុកោណ របស់រាជរដ្ឋាភិបាលកម្ពុជា។ ឯកឧត្តម ណែនាំដល់ពលរដ្ឋទាំងអស់ ដែលបានប័ណ្ណកម្មសិទ្ធិនេះ មានន័យថាជាដីកម្មសិទ្ធរបស់បងប្អូនពិតប្រាកដ ស្របច្បាប់ មិនព្រួយបារម្ភខ្លាចមានអ្នកណាមករំលោភបំពានអ្វីទៀតឡើយ និងជាការបង្កលក្ខណៈសម្បត្តិដល់ការលើកកម្ពស់កម្រិតជីវភាពរស់នៅរបស់ប្រជាពលរដ្ឋ ក្នុងការប្រកបរបរធ្វើអាជីវកម្ម ឫកសិកម្ម លើដីធ្លី និងអាចយកប័ណ្ណកម្មសិទ្ធនេះធ្វើជាដើមទុន ដើម្បីពង្រីកមុខរបររបស់ខ្លួនទៀត។

ទន្ទឹមនឹងនេះ ក៏សូមឱ្យបងប្អូនប្រជាពលរដ្ឋទាំងអស់ ត្រូវយកចិត្តទុកដាក់ប្រកបមុខរបរកសិកម្ម ចិញ្ចឹមសត្វបន្ថែមទៀត និងត្រូវថែរក្សាសុខភាពឱ្យបានល្អ ជាពិសេស ត្រូវចូលរួមអនុវត្តឱ្យបានខ្ជាប់ខ្ជួននូវវិធានការ ៣កុំ ៣ការពារ ដើម្បីកាត់ផ្តាច់ការឆ្លងនៃវីរុសកូវីដ-១៩។

លោក ម៉ៅ ចម្រើន ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត បានឱ្យដឹងថា សម្រាប់ដំណើរការវាស់វែងចុះបញ្ជីដីធ្លីនៅភូមិពូតាំង សង្កាត់រមនា ក្រុងសែនមនោរម្យ កន្លងមកវាស់វែង នឹងបំពេញទិន្នន័យព័ត៌មានបានចំនួន ៥៦៣ក្បាលដី ក្នុងនោះ មានដីលំនៅឋាន ដីកសិកម្ម ដីរដ្ឋ ក្បាលដីគ្មានទិន្នន័យ និងក្បាលដីទំនាស់ ក្នុងចំណោម ៥៦៣ក្បាលដី ត្រូវបានធ្វើចំណាត់ថ្នាក់តាមប្រភេទទ្រព្យ រួមមាន៖ ទ្រព្យរួមប្ដីប្រពន្ធ ទ្រព្យខាងប្រពន្ធ ទ្រព្យខាងប្ដី ទ្រព្យលីវ និងទ្រព្យអវិភាគ។ លោក ណែនាំដល់ប្រជាពលរដ្ឋទាំងអស់ នៅពេលទទួលបាន វិញ្ញាបនបត្រសម្គាល់ម្ចាស់អចលនវត្ថុនេះ បងប្អូនត្រូវតែមាន កាតព្វកិច្ចបង់សេវាចុះបញ្ជីដី តាមការកំណត់ដោយច្បាប់ ដែលមានរយៈពេល ០២ថ្ងៃ ចាប់ពីថ្ងៃនេះតទៅ នឹងត្រូវចែក នៅមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត៕

(សូមអានបន្ត)

អភិបាលខេត្ត នាំយកអំណោយសម្តេចតេជោ ចែកជូនប្រជាពលរដ្ឋក្រីក្រ និងចាស់ជរា នៅក្នុងក្រុងព្រះសីហនុ

ព្រះសីហនុ: ថ្ងៃទី០៦ ខែធ្នូ ឆ្នាំ២០២១

រសៀលថ្ងៃ១កើត ខែមិគសិរ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃអាទិត្យ ទី០៥ ខែធ្នូ ឆ្នាំ២០២១ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ បានអញ្ជើញសំណេះសំណាល និងនាំយកអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ចែកជូនប្រជាពលរដ្ឋក្រីក្រ និងចាស់ជរាគ្មានទីពឹង នៅសាលា ដុនបូស្កូ ស្ថិតនៅសង្កាត់លេខ៤ ក្រុង ខេត្តព្រះសីហនុ ដើម្បីទុកប្រើប្រាស់ក្នុងរដូវរងារ ។

ប្រជាពលរដ្ឋក្រីក្រ និងចាស់ជរាគ្មានទីពឹងមកពី ៤សង្កាត់ ក្នុងក្រុងព្រះសីហនុ មានចំនួន ៥០២នាក់ ក្នុងនោះ សង្កាត់លេខ១ ចំនួន ៣៨នាក់, សង្កាត់លេខ២ ចំន ៤៣នាក់, សង្កាត់លេខ៣ ចំនួន ១៤៨នាក់, និងសង្កាត់លេខ៤ ចំនួន ២៧៣នាក់។

ឯកឧត្តម គួច ចំរើន បានពាំនាំនូវការផ្តាំផ្ញើសួរសុខទុក្ខ និងសេចក្តីនឹករលឹកពីសម្តេច តេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនចំនពោះបងប្អូនប្រជាប្រជាពលរដ្ឋក្រីក្រ និងចាស់ជរាគ្មានទីពឹង ក្នុងក្រុងព្រះសីហនុ។ សម្តេចតេជោបានធ្វើការណែនាំឱ្យអាជ្ញាពិនិត្យមើលប្រជាពលរដ្ឋក្រីក្រ និងចាស់ជរាគ្មានទីពឹងមានអាយុច្រើន ម្យ៉ាងដោយសារអាកាសធាតុចុះត្រជាក់ចាប់ពីខែធ្នូនេះ ជាការគំរាមកំហែងដល់សុខភាពរបស់លោកយាយ លោកតា នៅក្នុងមូលដ្ឋាន។ ជារៀងរាល់ឆ្នាំនៅពេលធ្លាក់ខ្យល់ត្រជាក់ ប្រជាពលរដ្ឋមានការឆ្លងនូវជំងឺផ្តាសាយ ក៏ប៉ុន្តែឆ្នាំកន្លងមក ក៏ដូចឆ្នាំនេះ កម្ពុជាក៏ដូចជាពិភពលោកទាំងមូល មានការគំរាមកំហែងនឹងជំងឺកូវីដ-១៩ ហើយនៅពេលចុះត្រជាក់ប្រជាជនយើងអាចប្រឈមនឹងជីងឺផ្តាសាយ ។ ដូច្នេះយើងត្រូវការគ្រប់គ្រងជំងឺស្តាសាយ និងជំងឺកូវីដ-១៩ទាំងអស់គ្នា។ តាមការព្យាករណ៍កម្ពុជា មានការចុះត្រជាក់ជាងឆ្នាំកន្លងមក ទើបសម្តេចតេជោបានធ្វើការណែនាំដល់អាជ្ញាធរមូលដ្ឋា នយកអាវរងារ ភួយ ចែកជូនចាស់ជរា និងប្រជាពលរដ្ឋក្រីក្រនៅតាមមូលដ្ឋាន ដើម្បីប្រើប្រាស់ពាក់រក្សាកម្ដៅ ទប់ទល់នឹងភាពត្រជាក់ ហើយនេះជាការគិតគូរគ្រប់ជ្រុងជ្រោយរបស់ សម្តេចតេជោ ជូនចំពោះចាស់ជរា និងប្រជាពលរដ្ឋក្រីក្រនៅទូទាំងប្រទេស ក៏ជាការឆ្លុះបញ្ចាំងពីការយកចិត្តទុកដាក់ និងដោះស្រាយឆ្លើយតបបានទាន់ពេលវេលា ។

ឯកឧត្តម អភិបាលខេត្ត បានកោតសរសើរអាជ្ញាធរភូមិ សង្កាត់ ក្រុមប្រឹក្សាសង្កាត់ អភិបាលក្រុងព្រះសីហនុ ដែលតែងតែគិតគូរពីការងារសន្តិសុខ សុវត្ថិភាព និងបរិស្ថាននៅមូលដ្ឋាន ជាពិសេស គឺសុខទុក្ខរបស់បងប្អូនប្រជាពលរដ្ឋក្រីក្រ និងចាស់ជរានៅក្នុងមូលដ្ឋាន និងឈ្វេងយល់ពីការលំបាក ការខ្វះខាតរបស់លោកយាយ លោកតា គ្រប់ពេលវេលា សូមលោកតា លោកយាយ បន្តគាំទ្រដល់ពួកគាត់ ដើម្បីគាត់មានលទ្ធភាពបម្រើបងប្អូនបន្តទៀត។ ព្រមទាំងបានអំពាវនាវដល់លោកយាយ លោកតា ត្រូវថែទាំសុខភាពពេលអាកាសធាតុចុះត្រជាក់ ទី១.កុំឱ្យឆ្លងជំងឺកូវីដ-១៩ ទី២.កុំឱ្យឆ្លងជំងឺផ្តាសសាយ ត្រូវពាក់ម៉ាស លាងសម្អាតដៃឱ្យបានញឹកញាប់ជាមួយសាប៊ូ ជែល អាល់កុល ការរក្សាគម្លាតសុវត្ថិភាព ជាការសំខាន់សម្រាប់ខ្លួនយើង ក្រុមគ្រួសារកូន ចៅរបស់យើងមានសុខភាពល្អ ។

អំណោយសម្តេចតេជោ ផ្តល់ជូនប្រជាពលរដ្ឋក្រីក្រ និងចាស់ជរាគ្មានទីពឹងចំនួន ៥០២នាក់ មកពី៤សង្កាត់ ក្នុងក្រុងព្រះសីហនុ រួមមាន៖ អាវរងា១, ភួយ១, ក្រមា១, តែ១កញ្ចប់ , ស្ករស១គីឡូក្រាម, ទឹកគោខាប់៦កំប៉ុង, នំ១ប្រអប់, ម៉ាស១០ និងថវិកា ៥ម៉ឺនរៀល ។

សូមបញ្ជាក់ថា ឯកឧត្តម អភិបាលខេត្ត បាននាំយកអំណោយសម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនប្រជាពលរដ្ឋក្រីក្រ ចាស់ជរាគ្មានទីពឹងនៅស្រុកព្រៃនប់ ស្រុកកំពង់សិលា ស្រុកស្ទឹងហាវ និងក្រុងកោះរ៉ុង រួចហើយដែរ ៕ ដោយ ងូ សុមុនី សម្រួលផ្សាយដោយ៖ dara

(សូមអានបន្ត)

ប្រតិភូសិក្ខាកាមនៃសាលាភូមិន្ទរដ្ឋបាលចំនួន១១២រូប ធ្វើទស្សនកិច្ចសិក្សានៅរដ្ឋសភា និងព្រឹទ្ធសភានៃព្រះរាជាណាចក្រកម្ពុជា

(ភ្នំពេញ)៖ ប្រតិភូសិក្ខាកាមវគ្គបណ្តុះបណ្តាលកសាងសមត្ថភាពគណៈគ្រប់គ្រងអង្គភាពសាធារណៈ មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀន និងអង្គភាពពាក់ព័ន្ធ ឆ្នាំ២០២១ នៃសាលាភូមិន្ទរដ្ឋបាលចំនួន១១២រូប នៅថ្ងៃសុក្រ ទី០៣ ខែធ្នូ ឆ្នាំ២០២១ បានធ្វើទស្សនកិច្ចសិក្សាស្វែងយល់អំពីទិដ្ឋភាពទូទៅ និងតួនាទីភារកិច្ចសំខាន់របស់រដ្ឋសភា និងព្រឹទ្ធសភា នៃព្រះរាជាណាចក្រកម្ពុជា។

ប្រតិភូនេះដឹកនាំដោយ លោក សុខ សេងយ៉ន អនុរដ្ឋលេខាធិការ ក្រសួងមុខងារសាធារណៈ និងជានាយករងសាលាភូមិន្ទរដ្ឋបាល, លោកជំទាវឧត្តមសេនីយ៍ឯក ជ័យ បុប្ផា អគ្គលេខាធិការរង នៃអាជ្ញាធរជាតិប្រឆាំងគ្រឿងញៀន។

លោក សុខ សេងយ៉ន អនុរដ្ឋលេខាធិការ ក្រសួងមុខងារសាធារណៈ និងជានាយករងសាលាភូមិន្ទរដ្ឋបាល បានបញ្ជាក់ឱ្យដឹងថា ប្រតិភូជាសិក្ខាកាមក្នុងវគ្គបណ្តុះបណ្តាលកសាងសមត្ថភាពគណៈគ្រប់គ្រងអង្គភាពសាធារណៈ មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀន និងអង្គភាពពាក់ព័ន្ធ ឆ្នាំ២០២១ នៃសាលាភូមិន្ទរដ្ឋបាលទាំង១១២រូប គឺជាមន្រ្តីរាជការមកពីអង្គភាព-ស្ថាប័ននានារួមមាន៖ ខុទ្ទកាល័យសម្តេចតេជោនាយករដ្ឋមន្រ្តី, ខុទ្ទកាល័យឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន, កងរាជអាវុធហត្ថលើផ្ទៃប្រទេស, គណៈកម្មាធិការជាតិប្រឆាំងភេរវកម្ម, អធិការដ្ឋាននគរបាលខណ្ឌ និងអង្គភាពផ្សេងៗមួយចំនួនទៀត។

វគ្គបណ្តុះបណ្តាលនេះសិក្សារយៈពេល១៥០ម៉ោង ចែកជា០៤មណ្ឌលគឺ៖
-មណ្ឌលទី១-ការស្វែងយល់ពីទស្សនៈរបស់ប្រធានស្ថាប័ន
-មណ្ឌលទី២-ជំនាញរដ្ឋបាលនិងការងារទំនាក់ទំនង
-មណ្ឌលទី៣-ការគ្រប់គ្រងនិងការរៀបចំថវិកាអង្គភាព
-មណ្ឌលទី៤-ករណីសិក្សា ដូចជាករណីសិក្សានៅរដ្ឋសភា និងព្រឹទ្ធសភានាថ្ងៃនេះ ហើយនឹងបន្ត ករណីសិក្សានៅអង្គភាព តំបន់អភិវឌ្ឍន៍ និងនៅតាមទីកន្លែងផ្សេងៗទៀត។

ជាមួយគ្នានេះមានម៉ោងអនុវត្តមេរៀនចំនួន៣៦ម៉ោង, ម៉ោងអនុវត្តផ្ទាល់លើករណីសិក្សា និងការងារសង្គមចំនួន៤៥ម៉ោង និងម៉ោងបច្ចេកទេសចំនួន៣៧ម៉ោង ដែលកម្មវិធីទាំងអស់នេះ រៀបចំក្នុងគោលបំណង ចង់ឱ្យសិក្ខាកាមជាថ្នាក់ដឹកនាំទាំង១១២រូប កាន់តែមានសមត្ថភាពជំនាញគ្រប់គ្រង តាមរយៈការលើកកម្ពស់នវានុវត្តន៍ និងកិច្ចសហប្រតិបត្តិការ ព្រមទាំងការបង្កើតទស្សនៈវិស្ស័យនិងយុទ្ធសាស្រ្ត ការកសាងក្រុមដែលមានសមត្ថភាពឆ្ពោះទៅរកកិច្ចសហការការងារ និងភាពជាដៃគូ ដើម្បីលើកកម្ពស់ការគិតបែបនវានុវត្តន៍ និងការដោះស្រាយបញ្ហាប្រកបដោយប្រសិទ្ធិភាព។

តាមការសង្កេតនៅក្នុងកម្មវិធីទស្សនកិច្ចសិក្សានេះ ឃើញថា សិក្ខាកាមមានការចាប់អារម្មណ៍ខ្ពស់ចំពោះតួនាទីភារកិច្ចសំខាន់ៗរបស់រដ្ឋសភាព និងព្រឹទ្ធសភា នៃព្រះរាជាណាចក្រកម្ពុជា ព្រោះបន្ទាប់ពីការថ្លែងបឋកថារបស់លោក ឡេង ប៉េងឡុង អគ្គលេខាធិការរដ្ឋសភាព និងការធ្វើបទបង្ហាញរបស់លោក កៃ កេតនិន អគ្គនាយក នៃអគ្គនាយកដ្ឋាននីតិកម្ម និងសិក្សាស្រាវជា្រវ នៃអគ្គលេខាធិការរដ្ឋសភា ព្រមទាំងការធ្វើបទបង្ហាញរបស់លោក ប៊ុន វុទ្ធា អគ្គនាយក នៃអគ្គនាយកដ្ឋានសេវាកម្មច្បាប់ និងសមូហភាពដែនដី នៃអគ្គលេខាធិការព្រឹទ្ធសភា ឃើញថាសិក្ខាកម្មបានកត់ត្រា និងចោទសួរយ៉ាងយកចិត្តទុកដាក់លើតួនាទីភារកិច្ចរបស់រដ្ឋសភា និងព្រឹទ្ធសភា នៃព្រះរាជាណាចក្រកម្ពុជា៕

(សូមអានបន្ត)

សម្ដេចតេជោ ហ៊ុន សែន បង្ហាញរូបថតជាមួយកូនប្រុសច្បង និងក្រុមគ្រួសារ ដើម្បីឱ្យក្រុមអ្នកវិភាគល្ងង់ទូយកទៅវិភាគបន្ត

 ភ្នំពេញ: ថ្ងៃទី០៤ ខែធ្នូ ឆ្នាំ២០២១

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហាញនូវរូបរបស់សម្ដេច ជាមួយកូនប្រុសច្បង និងក្រុមគ្រួសារ ដើម្បីឱ្យក្រុមអ្នកវិភាគល្ងង់ទូយកទៅវិភាគបន្ត ដោយមិនចាំបាច់ទៅវិភាគរឿងផ្សេងនាំឱ្យលំបាកនោះ។

នៅលើបណ្ដាញទំនាក់ទំនងសង្គមហ្វេសប៊ុក នាព្រឹកថ្ងៃទី ០៤ ខែធ្នូ ឆ្នាំ២០២១ សម្ដេចតេជោបានសរសេរថា កន្លងមកមានក្មួយៗដែលនិយមលេងរូបថត បានផ្គុំរូបថតខ្ញុំជាមួយកូនប្រុសច្បងរបស់ខ្ញុំ ហ៊ុន ម៉ាណែត និងផ្គុំរូបថតខ្ញុំនិងភរិយា ជាមួយរូបថតម៉ាណែតនិងភរិយា។ គាត់បានប្រាប់ខ្ញុំថាលោកអុំសង្ហាដូចបងម៉ាណែត និងក្មួយខ្លះនិយាយថាអុំប្រុស អុំស្រីសង្ហាដូចបងម៉ាណែតនិងប្រពន្ធគាត់។ ខ្ញុំបានប្រាប់ទៅក្មួយៗវិញថាតើម៉ាណែត បង្កើតអុំ ឬអុំបង្កើតម៉ាណែត។

សម្ដេចតេជោនាយករដ្ឋមន្ត្រីបន្តថា អត្ថបទមួយនេះនឹងធ្វើឱ្យក្រុមវិភាគ យកទៅវិភាគបាន យ៉ាងហោចណាស់មួយសប្តាហ៍ ដើម្បីមានការងារធ្វើរកលុយចិញ្ចឹមជិវិត ឬសុំសិទ្ធិជ្រកកោននៅក្រៅប្រទេស។

សម្ដេចតេជោនាយករដ្ឋមន្ត្រីលើកឡើងថា ថ្ងៃមុនគេវិភាគរឿងចៅទី២១ស្រក់ទឹកភ្នែកតែមិនយំ។ ល្អហើយខ្ញុំមានចៅ២២នាក់ និងកូនបង្កើត កូនប្រសារ១០នាក់ ទៀតដែលខ្ញុំនឹងជួយពួកអ្នកឱ្យធ្វើការវិភាគតែរឿងគ្រួសារខ្ញុំ ដោយមិនចាំបាច់ទៅវិភាគរឿងផ្សេងនាំលំបាក។ នេះជាវិធីរុញទូកបណ្តោយទឹកដើម្បីតម្រូវចិត្តក្រុមវិភាគល្ងង់ទូ៕

(សូមអានបន្ត)

លោក ទេស វិបុល ប្រធាន សមាគមសេរីភាពអ្នកសារព័ត៏មានកម្ពុជា សូមប្រកាសគាំទ្រយ៉ាងពេញទំហឹង ចំពោះប្រសាសន៍របស់សម្តេចតេជោ ហ៊ុន សែន ប្រកាសគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តី នាពេលអនាគត់

       

(កណ្តាល):លោក ទេស វិបុល ប្រធានសមាគមសេរីភាពអ្នកសារព័ត៏មានកម្ពុជា សូមប្រកាសគាំទ្រយ៉ាងពេញទំហឹង ចំពោះប្រសាសន៍របស់សម្តេចតេជោ ហ៊ុន សែន ប្រកាសគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្រ្តី នាពេលអនាគត់។

ឯកឧត្តម ហ៊ុន ម៉ាណែត គឺជាយុវជនជំនាន់ថ្មី និងជាឥស្សរជនថ្នាក់ដឹកនាំខ្មែរដ៏ឆ្នើមមួយរូបរបស់កម្ពុជា ពោរពេញដោយសមត្ថភាព និងទេពកោសល្យខ្ពស់ ព្រមទាំងមានគុណធម៌ និងសីលធម៌ដ៏ល្អ ដែលទទួលបានការកោតសរសើរ, ការគោរព និងការស្រឡាញ់ពីសំណាក់ប្រជាជនទូទៅ, មន្រ្តីរាជការ និងកងកម្លាំងប្រដាប់អាវុធ ហើយបាន និងកំពុងរួមចំណែកដឹកនាំ និងចូលរួមយ៉ាងសកម្ម ក្នុងបេសកកម្មដើម្បីបុព្វហេតុជាតិ មាតុភូមិ និងប្រជាជនកម្ពុជា។

យើងខ្ញុំទាំងអស់គ្នាមានជំនឿយ៉ាងមុតមាំថា ឯកឧត្តម ហ៊ុន ម៉ាណែត ពិតជាឥស្សរជនដែលស័ក្តិសមជាអនាគតនាយករដ្ឋមន្រ្តី នៃព្រះរាជាណាចក្រកម្ពុជា ដើម្បីបន្តវេនដឹកនាំការពារបូរណភាពទឹកដី សុខសន្តិភាព និងស្ថិរភាពសង្គម, ការលើកកម្ពស់កិត្យានុភាពជាតិ និងការអភិវឌ្ឍជាតិឲ្យកាន់តែមានភាពរីកចម្រើនលើគ្រប់វិស័យ ដើម្បីវិបុលភាព សេចក្តីសុខ និងសុភមង្គលរបស់ប្រជាជនកម្ពុជា៕

(សូមអានបន្ត)

ព្រឹកនេះ សម្តេចតេជោ ហ៊ុន សែន អញ្ជើញសម្ពោធដាក់ឱ្យប្រើប្រាស់ជាផ្លូវការនូវហេដ្ឋារចនាសម្ព័ន្ធផ្លូវ៣៧ខ្សែនិងស្ថានីយប្រព្រឹត្តិកម្មទឹកកខ្វក់ទី១និងទី២ក្នុងខេត្តព្រះសីហនុ

      នៅព្រឹកថ្ងៃទី០២ ខែធ្នូ ឆ្នាំ២០២១នេះ សម្តេចអគ្គមហាសេនាបតីតេជោហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជាបានអញ្ជើញជាអធិបតីដ៏ខ្ពង់ខ្ពស់សម្ពោធដាក់ឲ្យប្រើប្រាស់ជាផ្លូវការហេដ្ឋារចនា សម្ព័ន្ធផ្លូវចំនួន ៣៧ ខ្សែនិងស្ថានីយប្រព្រឹត្តិកម្មទឹកកខ្វក់ទី 1 និងទី 2 ក្នុងខេត្តព្រះសីហនុ។ 

    តាមតាមសុន្ទរកថាស្វាគមន៍ និងរបាយ ការណ៍សាងសង់របស់ឯកឧត្តមជា សុផារ៉ាឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់និងជាប្រធានគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាបានឲ្យដឹងថា ការស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៧ ខ្សែក្នុងខេត្តព្រះសីហនុគឺជាគំនិតផ្ដួចផ្ដើមដ៏ថ្លៃថ្លារបស់សម្ដេចតេជោនាយករដ្ឋមន្ត្រីកាលពីថ្ងៃទី ៣០ ខែសីហាឆ្នាំ២០១៩ ដើម្បីកែលម្អខ្សែផ្លូវមេយុទ្ធសា ស្ត្រនៃប្រព័ន្ធនគរូបនីយកម្មគមនាគមន៍ដឹកជញ្ជូនសេដ្ឋកិច្ចធុរកិច្ចនិងទេសចរណ៍នៃខេត្តព្រះសីហនុសំដៅរួមចំណែកកាត់ បន្ថយភាពក្រីក្រលើកកម្ពស់កម្រិតជីវភាពរស់នៅរបស់ប្រជាពលរដ្ឋនិងលើកកម្ពស់សោភ័ណភាពរបស់ខេត្ត។ ការស្ថាបនាផ្លូវនេះបានចូលរួមចំណែកដ៏ធំធេងក្នុងការ សម្រេចនូវចក្ខុវិស័យរបស់រាជរដ្ឋាភិបាលដែលបានកំណត់ក្នុងផែនការរៀបចំដែនដីខេត្តព្រះសីហនុចក្ខុវិស័យឆ្នាំ២០៣០ សំដៅអភិវឌ្ឍខេត្តព្រះសីហនុដែលជាប៉ូលអភិវឌ្ឍន៍ជាតិប្រកបដោយចីរភាពនៅតំបន់ ឆ្នេរសមុទ្រកម្ពុជាឱ្យក្លាយជាតំបន់សេដ្ឋកិច្ចពិសេសគំរូពហុបំណងមជ្ឈមណ្ឌលកំណើ នជាតិនិងមជ្ឈមណ្ឌលភស្តុភារកម្មជាតិ តាមរយៈការអភិវឌ្ឍទីក្រុងឆ្លាតនិងការធ្វើសមាហរណកម្មតំបន់ឆ្នេរសមុទ្រកម្ពុជា ។

    គម្រោងស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៧ខែក្នុងខេត្តព្រះសីហនុ បានបើកការដ្ឋានសាងសង់ក្រោមអធិបតីភាពដ៏ខ្ពង់ខ្ពស់សម្តេចតេជោនាយករដ្ឋមន្ត្រី កាល ពីថ្ងៃ១៦ ខែវិច្ឆិកា ឆ្នាំ២០១៩ និងបានបញ្ចប់ការដ្ឋានកាលពីថ្ងៃទី១ ខែ មេសា ឆ្នាំ ២០២១។ ខ្សែផ្លូវទាំង ៣៧ ខ្សែ មានប្រវែងសរុប ៨៤ គីឡូម៉ែត្រ និងមានផ្ទៃក្រឡាសរុប ១ ៤៧០ ៥១១ ម៉ែត្រការ៉េ សាង សង់ដោយអង្គភាពនិងក្រុមហ៊ុនចំនួន ០៨ និងចែកចេញជា ៣ ប្រភេទ រួមមានមហា វិថីចំនួន ៣ខ្សែ ប្រវែង ២០,៨ គីឡូម៉ែត្រ វិថីចំនួន ១៥ ខ្សែ ប្រវែង ៥០,៣ គីឡូ ម៉ែត្រ និងអនុវិថីចំនួន ១៩ ខ្សែ ប្រវែង ១២,៨ គីឡូម៉ែត្រ។ ខ្សែផ្លូវទាំង ៣៧ខ្សែ ត្រូវបានគិតគួរតាមនគរូបនីយកម្មហេដ្ឋា រចនាសម្ព័ន្ធផ្លូវក្រុងដែលមានភាពចាំបាច់ ដើម្បីធ្វើឱ្យក្រុងព្រះ សីហនុក្លាយជាទីក្រុងដែលមានចរាចរណ៍ល្អប្រសើរប្រកបដោយនិរន្តរភាព ដើម្បីធានាការជំរុញការតភ្ជាប់និងបញ្ចៀសការកកស្ទះនៅលើផ្លូវជាតិលេខ៤ តម្រោងបានបង្កើតខ្សែផ្លូវថ្មីដោយត្រូវកាត់សម្រួត កម្ពស់ភ្នំចន្លោះពី ៨ ម៉ែត្រ ទៅ ១៥ម៉ែត្រ និងយកមាឌដីនិងថ្មចេញសរុបប្រមាណ ១,០២ លានម៉ែត្រគូប ដើម្បីទទួលបានជម្រាលពី៦,៥% ទៅ ៧% តាមបទដ្ឋានបច្ចេកទេស។ ខ្សែផ្លូវនីមួយៗរួមមាន ធ្វើពីបេតុង សរសៃដែក និងក្រាលដោយកម្រាលកៅស៊ូទឹម មានបណ្ដា ញលូទឹកភ្លៀង និងលូទឹកកខ្វក់ផ្សេងគ្នា។ ចិញ្ចើមផ្លូវមានខឿនថ្មក្រានិត ផ្លូវថ្មើរជើង ផ្លូវសម្រាប់ជនមានពិការភាព និងផ្លូវជិះកង់ក្រាលថ្មក្រានីត។ ដើម្បីតភ្ជាប់ខ្សែផ្លូវទាំង អស់ តម្រោងក៏បានសាងសង់ស្ពានចំនួន ៥ កន្លែង ប្រវែងសរុប ២៩៦ ម៉ែត្រ។

    ឯកឧត្តមជា សុផារ៉ា បានបន្តថាគម្រោងបានរៀបចំទីលានតេជោដែលមានទំហំ ២៣ ៥៩៣ ម៉ែត្រការ៉េ សម្រាប់ជូនប្រជា ពលរដ្ឋធ្វើពិធី ជួបជុំ ហាត់ប្រាណ និងដើរ កម្សាន្ត និងរៀបចំចំណតរថយន្តទេស ចរណ៍ RV ចំនួន ១០ចំណត និង រថយន្តគ្រួសារចំនួន ១១៤ចំណត។

  ក្រៅពីការស្ថាបនាផ្លូវក្រុងទាំង ៣៧. ខ្សែខាងលើ គម្រោងក៍បានបំពាក់កាមេរ៉ាសុវត្ថិ ភាពចំនួន ៥៣៣ គ្រឿង ដំឡើងបង្គោលភ្លើងបំភ្លឺផ្លូវចំនួន ៤ ៥៩២ បង្គោល, បំពាក់អំពូលភ្លើងឆ្លាតបំភ្លឺផ្លូវសាធារណ:របស់ក្រុមហ៊ុន Minebea ចំនួន ៥ ៣០០ អំពូល ដាំផ្កា និងដើមឈើនៅអមសងខាងផ្លូវ ដាំស្មៅ ស្ថាបនា ចម្លាក់បដិមាចំនួន ៥ . ទីតាំង ចាក់បំពេញខ្សាច់ស រៀបចំផ្លូវថ្មើរ ជើងតាមបណ្ដោយឆ្នេរប្រវែង ៩,៣២ គីឡូម៉ែត្រ សាងសង់បន្ទប់ទឹកសាធារណៈចំនួន ១១កន្លែងរៀបចំកន្លែងអង្គុយកម្សាន្តសាធារណៈ និង ស្តារអូរ-ប្រឡាយ។

    ស្ថានីយប្រព្រឹត្តិកម្មទឹកកខ្វក់ចំនួន ២ កន្លែងដែលសាងសង់រួចនិងកំពុងដំណើរ ការប្រើប្រាស់បច្ចេកវិទ្យា MABR (Membrane Aerobic Biological Reactor) ដែលជាបច្ចេកវិទ្យាចុងក្រោយរបស់ ប្រទេសអ៊ីស្រាអែល មានលទ្ធភាពកម្ចាត់ពពួកបាក់តេរី និងដកយកនូវសារ ធាតុ BOD, COD, អាម៉ូញាក់ (NH3-N), នីត្រាត (NO3-N), ផូស្វរ(P) និងសារ ធាតុពុលផ្សេងទៀត ហើយត្រូវបានទទួល ស្គាល់ថាជាបច្ចេកវិទ្យាមានស្ថិរភាព ប្រសិទ្ធភាព សន្សំសំចៃថាមពល គ្មានសំឡេងរំខាន និងគ្មានក្លិនប៉ះពាល់ដល់ អ្នកជិតខាង។ ស្ថានីយទី១ មានសមត្ថភាពចម្រុះទឹកកខ្វក់ ៥ ២០០ ម៉ែត្រគូបក្នុង ១ ថ្ងៃ និងស្ថានីយទី២ មានសមត្ថភាពចមោះទឹកកខ្វក់ ៧ ២០០ ម៉ែត្រគូបក្នុង ១ ថ្ងៃ។ បច្ចុប្បន្ន គម្រោងកំពុងស្ថាបនាស្ថានីយទី ៣ ដែលមានសមត្ថភាពចគ្រោះទឹកកខ្វក់ ២០ ០០០ ម៉ែត្រគូបក្នុង ១ ថ្ងៃ។

ហេដ្ឋារចនាសម្ព័ន្ធទាំងអស់ដែលបានស្ថាបនារួចខាងលើ បានចំណាយសរុប ៣២៤ ០៧៩ ៩៦៤ ដុល្លារសហរដ្ឋអាមេ រិក ក្នុងនោះថវិការបស់រាជរដ្ឋាភិបាលចំនួន ៣១០ ៤៦៦ ២៧៦ ដុល្លារ ថវិកា ក្រុម ហ៊ុន Vinci ចំនួន ១០១៦៣ ៥៩៣ ដុល្លារ ឯកឧត្តមអ្នកឧកញ៉ា លី យ៉ុងផាត់ ចំនួន ៣ ០០០ ០០០ ដុល្លារ និងឯកឧត្តមនាយឧត្តមសេនីយ៍ ខេង សុមេធ ចំនួន ៥០០ ០០០ ដុល្លារ។ សមិទ្ធផលទាំង នេះ នឹងចូលរួមសម្រួលរំហូរចរាចរណ៍ ទាក់ទាញទេសចរជាតិនិងអន្តរជាតិ បង្កើតមុខរបរ បង្កើនប្រាក់ចំណូលដល់ពលរដ្ឋ កាត់បន្ថយការធ្វើចំណាកស្រុក ធ្វើឱ្យប្រជា ជនយើងមានជីវភាពល្អប្រសើរ មានភាព សុខដុមក្នុងសង្គម។

    ឯកឧត្តមឧបនាយករដ្ឋមន្ត្រី ជា សុផារ៉ា បានបញ្ជាក់ថា សមិទ្ធផលទាំងឡាយខាង លើនេះ បានមកពីការដឹកនាំដ៏ត្រឹមត្រូវនិងការចង្អុលដាក់ទិសដ៏ច្បាស់លាស់និងម៉ឺង ម៉ាត់របស់សម្ដេចតេជោនិងការសហការរបស់ក្រសួងស្ថាប័ននិងរដ្ឋបាលនៃបណ្ដាខេត្តក្រុងស្រុកជាប់ឆ្នេរសមុទ្រកម្ពុជាទាំង អស់ដែលផ្ដល់លទ្ធភាពឲ្យគណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាបានចូលរួមអនុវត្តកម្មវិធីនយោបាយរបស់រាជរដ្ឋាភិបាលនីតិកាលទី ៦ នៃរដ្ឋសភា៕

(សូមអានបន្ត)

រដ្ឋបាលខេត្តក្រចេះ បើកកិច្ចប្រជុំបញ្ចប់ទំនាស់ដីធ្លីរវាងប្រជាពលរដ្ឋ និងក្រុមហ៊ុនវិនិយោគដីសម្បទានសេដ្ឋកិច្ចនៅស្រុកសំបូរ និងស្រុកព្រែកប្រសព្វ

 ក្រចេះ: ថ្ងៃទី០១ ខែធ្នូ ឆ្នាំ២០២១

ឯកឧត្តម វ៉ា ថន អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋខេត្តក្រចេះ បានអញ្ជើញបើកកិច្ចប្រជុំបូកសរុបលទ្ធផលការងារចុះសិក្សាលើទីតាំងដី ដែលប្រជាពលរដ្ឋមិនទាន់បានប្រើប្រាស់ និងដីដាំដុះក្នុងទីតាំងដីសម្បទានសេដ្ឋកិច្ចក្រុមហ៊ុន ស៊ី អេច ភី ប៊ី ឌីវេឡុបមេន ស្ថិតក្នុងឃុំកំពង់ចាម ឃុំវឌ្ឍនៈ ស្រុកសំបូរ និងឃុំជ្រោយបន្ទាយ ស្រុកព្រែកប្រសព្វ កាលពីរសៀលថ្ងៃ១១រោច ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអង្គារ ទី៣០ ខែវិច្ឆិកា ឆ្នាំ២០២១ ។

លោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោ ដីខេត្តក្រចេះ បានឱ្យដឹងថា ក្រុមហ៊ុន ស៊ី អេច ភី ប៊ី ឌីវេឡុបមេន ទទួលគោលការណ៍អនុញ្ញាតពីរាជរដ្ឋាភិបាល ក្នុងការវិនិយោគលើដីសម្បទានសេដ្ឋកិច្ច ស្ថិតក្នុងស្រុកសំបូរ និងស្រុកព្រែកប្រសព្វ ទំហំ ១២ ២០០.២៩ហិកតា ។

លោកប្រធានមន្ទីរបញ្ជាក់ថា យោងតាមលទ្ធផលការងារ ចុះសិក្សាផលប៉ះពាល់លម្អិតក្នុងដីសម្បទានសេដ្ឋកិច្ចរបស់ក្រុមហ៊ុន ដែលក្រុមការងារចម្រុះខេត្ត ស្រុក បានចុះវាស់វែង យើងបានកាត់ឆ្វៀលដីជូនប្រជាពលរដ្ឋ តាមរូបមន្តស្បែកខ្លាលើផ្ទៃដីទំហំ ៧ ៥០៤.៩៧ហិកតា ដែលប្រជាពលរដ្ឋបានចូលទន្រ្ទានកាន់កាប់ និងផ្ទៃដីដាំដុះទំហំ ២ ៦៨៦.៨៦ហិកតា ដើម្បីចុះបញ្ជីជាដីឯកជនរបស់រដ្ឋ ជូនក្រុមហ៊ុនធ្វើការវិនិយោគបន្ត ។

ឯកឧត្តម វ៉ា ថន អភិបាលនៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋខេត្តក្រចេះ បានបញ្ជាក់ថា គណៈកម្មាធិការគ្រប់គ្រងដីរដ្ឋខេត្ត បានសម្រេចអនុវត្តន៍តាមរូបមន្ត ស្បែកខ្លា ដែលជាគោលការណ៍ណែនាំរបស់ប្រមុខរាជរដ្ឋាភិបាល ដោយកាត់ឆ្វៀលដីជូនប្រជាពលរដ្ឋដើម្បីបញ្ចប់ទំនាស់ដីធ្លី រវាងប្រជាពលរដ្ឋ និងក្រុមហ៊ុន ដែលទទួលបានដីសម្បទានសេដ្ឋកិច្ច ពីរាជរដ្ឋាភិបាលក្នុងការធ្វើការអភិវឌ្ឍន៍បន្តលើផ្ទៃដីរបស់ខ្លួនប្រកបដោយសុវត្ថិភាព និងស្របច្បាប់ ។

នៅក្នុងកិច្ចប្រជុំនោះដែរឯកឧត្តមអភិបាលខេត្តក្រចេះ បានសម្រេចបិទបញ្ចប់នូវទំនាស់ដីខាងលើនេះ ដោយបានជំរុញដល់មន្ទីររៀបចំដែនដី នគរូបនីយកម្ម សំណង់ និងសុរិយោដី ត្រៀមរៀបចំបិទផ្សាយនូវការចុះបញ្ជីដីឯកជនរបស់រដ្ឋ នៅមូលដ្ឋានទំនាស់នោះជូនប្រជាពលរដ្ឋឱ្យបានដឹង ហើយអាជ្ញាធរស្រុក ឃុំ និងក្រុមហ៊ុន ត្រូវសហការគ្នាដើម្បីចុះកាយប្រឡាយក្រវាត់ព្រំដី រវាងក្រុមហ៊ុន និងប្រជាពលរដ្ឋ ដោយប្រាកដថា ពុំមានការចូល ទន្រ្ទានកាន់កាប់ដី ដោយខុសច្បាប់បន្តទៀតឡើយ ៕ដោយជួន សុជាតិ សម្រួលផ្សាយដោយ៖ dara

(សូមអានបន្ត)